Este libro, feito en colaboración co escritor Eric Sarner, tivo ata o momento edicións soamente en francés (edición orixinal) e en edicións biligües portugués - francés / inglés / castelán co título Carta de Lisboa. Calquera delas é xa moi difícil de atopar.
Tanto Eric como eu coñeciamos Lisboa desde facía tempo e acordamos unha metodoloxía de traballo simple: durante os quince días que duraría a nosa estancia percorreriamos xuntos a cidade, tomariamos notas e apuntes, pero en ningún momento os compartiriamos, de maneira que a visión do un non condicionase a do outro. Así o fixemos. Só houbo dúas claras violacións do acordo. A primeira, que ao cabo de dous ou tres días os dous advertimos que, imprevisiblemente, Lisboa estaba chea de sutís referencias animais. Estaba claro que ese fío condutor aparecería en texto e imaxes. A segunda, un fascinante suceso cunha fotografía atopada por azar nun lugar inverosímil. Era imposible non facer comentarios e elaborar unha historia común ao redor daquel achado.
